관리-도구

बैतडीमा भव्यताका साथ मनाइयो सहिद दिवस

बैतडी
बैतडी जिल्लामा सहिद दिवसको अवसरमा विभिन्न कार्यक्रमहरु गरिएका छन् । जिल्लाको दशरथचन्द नगरपालिका–०५ बस्कोट स्थीत जेष्ठ सहिद दशरथचन्दको जन्मघरमा विहानै भव्य रुपले कार्यक्रम गरिएको छ भने, सदरमुकाम गढी स्थीत सांस्कृतिक कार्यक्रमहरु गरिएकाछन् । 

यसका साथै जिल्लाको पाटन नगरपालिका वडा न.४ स्थीत सहिद वाटिकामा कोणसभा आयोजना गरिएको छ । जिल्ला स्थीत स्थानियतह र विद्यालयहरुले आ–आफ्नै तवरले सदवस विशेष कार्यक्रमहरु गरेकाछन् । 

सहिद दिवसको अवसर पारि दशरथचन्द नगरपालिकाले नगर क्षेत्र सरसफाई गर्नुका साथै महिलाहरुका लागि १महिने लोकसेवा तयारी कक्षाको सुरुवात गरेको छ । 

इतिहासको विभिन्न कालखण्डमा प्रजातन्त्रको स्थापना, राष्ट्र निर्माण र स्वतन्त्रता सहित जनताका पक्षमा भएका आन्दोलनमा मृत्युवरण गरेका वीर सपुतहरूको सम्मानमा बैतडीमा साताव्यापी कार्यक्रम गरी शहीद दिवस मनाउने परम्परा छ । साताव्यापी कार्यक्रमको अन्तिम दिन मंगलबार बैतडीमा प्रभातफेरी सहित शहीद दशरथचन्दको जन्मघर र विभिन्न ठाउँहरुमा अवस्थीत सहिदका शालिकहरुमा माल्यार्पण गर्दै दिवस मनाइएको हो ।

विभिन्न कार्यक्रमहरुमा उपस्थित व्यक्तिहरुले शहीदहरुको सम्झना एवं उनिहरुले गरेको क्रान्तीको प्रसंसा गरेका छन् । सरोकारवालाहरुले अझै सम्मपनि शहीदहरुका सपना पुरा हुन नसकेकोप्रति भने चिन्ताव्यक्त गरेका छन् । 

दशरथचन्दको जन्मघरमा नेपाल प्रहरी र शसस्त्र प्रहरीले शहीदप्रति सलामी अर्पण छ ।  

सरकारले शहीद दिवस विशेष कार्यक्रम सहित मनाउने घोषणा गरे पनि सार्वजनिक विदा भने दिएको छैन ।  

वि.सं. १९९७ माघ १० गते निरंकुश राणा शासनविरुद्धमा नेपाल प्रजापरिषद् स्थापना गरी जनतालाई आफ्नो हक र अधिकारका लागि क्रान्ति गर्न प्रेरित गर्ने शुक्रराजलाई टेकुस्थित खरीको रूखमा झुन्ड्याएर हत्या गरिएको थियो ।

यस्तै, सोही वर्ष माघ १३ गते सिफलमा धर्मभक्तलाई झुन्ड्याइएको थियो भने माघ १५ गते दशरथ चन्द र गंगालाललाई शोभा भगवतीमा गोली हानी हत्या गरिएको थियो । नेपालको पहिलो शहीद भने लखन थापालाई मानिन्छ ।

मुलुकमा पछिल्लोपटक झैझगडा र दुर्घटनामा ज्यान गुमाएका व्यक्तिलाई समेत शहीद घोषणा गर्नुपर्ने र रु १० लाख आर्थिक सहयोगका लागि दबाब दिने प्रचलनले वास्तविक शहीदको भावनामा चोट पुगेको गुनासा बढ्न थालेको छ ।

सहिदलाई प्रत्येक वर्ष माघ १६ गते सम्झने गरे पनि सपना पूरा गर्न हुनुपर्ने जति काम नभएको गुनासो यस अवसरमा हुने गरेको सुनिन्छ । यस दिन हुने औपचारिक कार्यक्रममा जिम्मेवार अधिकारीहरुबाट शहीदको सपना पूरा गर्न लागिपरेको प्रतिबद्धता भने निरन्तर आउने गरेको छ । पछिल्लो समय स्पष्ट परिभाषा नगरी शहीद घोषणा गरिएको भनी जनस्तरबाट टिप्पणी हुने गरेको छ ।